నజీర్ హుస్సేన్ ఫిలింస్ నిర్మించిన శృంగార, హాస్య ప్రధాన చిత్రం ''జబ్ ప్యార్ కిసీసే హోతాహై'' పత్రికా విమర్శకుల దృష్టిలో కాకపోయినా బాక్సాఫీసర్ల దృష్టిలోనూ, వినోదార్థుల దృష్టిలోనూ అత్యుత్తమ చిత్రం అనడంలో సందేహం లేదు. చలన చిత్రాలలో నూటికి నూరు పాళ్ళూ వినోదం అనబడేదాన్ని చొప్పించడం నజీర్ హుస్సేన్ లక్ష్యం. ఆ లక్ష్యానికి అనుగుణంగానే ఆయన ఈ చిత్రాన్ని రూపొందించారు.
నూటికి నూరు పాళ్లూ ఈ చిత్రం యువజన మనోరంజకంగా తయారైంది. కళా ప్రమాణాలను గురించి, నైతిక విలువలను గురించి, ఆట్టే పట్టింపులేని వారికి, కాలక్షేపమే ప్రధానమైనవారికి ఇది అమృతోసమానమైన చిత్రం. దర్శక, నిర్మాతల సంకల్పం పూర్తిగా సిద్ధించింది. ఎందుకంటే వారు చెప్పదలచుకున్నది ఏదైనా సూటిగా వేగంగా, చచ్చులేకుండా చెప్పగలిగారు.
అశోక్ పిక్చర్స్ వారి తాజా చిత్రం కల్పన లోగడ అశోక్ కుమార్ నిర్మించిన 'రాగిణి'తో సరితూగేవిధఁగా ఉంది. ఆ చిత్రాన్ని చూసినవారు ఈ చిత్రం ఎంత బాగుంటుందో ఉజ్ఞాయింపుగా ఊహించుకోవచ్చును. అయితే, ఆ చిత్రం కంటే ఈ చిత్రానికి ప్రచారం ఎక్కువ జరిగింది కనుక జనం కొండంత ఆశలు పెంచుకున్నారు. వారికి ఈ చిత్రం ఆశాభంగం కలిగిస్తుందనడం సాహసమే అవుతుంది. మన మెజారిటీ ప్రేక్షకులకు ఈ చిత్రం పాత చొక్కా తొడుక్కున్నంత సుఖంగా ఉంటుంది.
చెప్పుకోతగ్గ కథ ఏమీ లేకుండానే నూటికి నూరుపాళ్ళూ ఉత్తమ వినోదచిత్రం అనిపించుకున్న హిందీ చిత్రాలు ఈమధ్య చాలా అరుదుగా వచ్చాయి. అలాంటి అరుదైన చిత్రాలలో 'మియాబీబీరాజీ' ఒకటి.
చాలా అరుదైన అందమైన ప్రకృతిదృశ్యాలు, బ్రహ్మాండమైన సెట్టింగులు, ఆడంబరమైన కలర్ డ్యాన్సులు, అట్టహాసభరితమైన పాటలు, యుద్ధాలు, సస్పెన్సు, ఏనుగులు, గుర్రాలు ఈ చిత్రంలో పుష్కలంగా ఉన్నాయి.
ఫిల్మాలయావారి సమ్మోహనాస్త్రం
నేటి నవనాగరిక ప్రపంచంలో యువతీ యువకుల మధుర స్వప్నాలకు ప్రతిబింబం 'లవ్ ఇన్ సిమ్లా'. స్వాప్నిక ప్రపంచంలోవలెనే ఈ చిత్రంలో కూడా వాస్తవికతకు తావులేదు. అయితే కల మధురంగా ఉంటే వాస్తవికత ప్రశ్నరాదు. తియ్యటి కలల్ని మళ్ళీ మళ్ళీ నెమరువేసుకున్నట్లే ఎన్ని సార్లు చూసినా తనివితీరని చిత్రం 'లవ్ ఇన్ సిమ్లా'. యువ ప్రేక్షకులపై ఎస్. ముఖర్జీ గారి తాజా సమ్మోహనాస్త్రం ఇది.
పోషించే తాహతు లేనప్పుడు 'ఒకరి తర్వాత ఒకరు'గా అదే పనిగా సంతానాన్ని ఉత్పత్తి చేయటం చాలా ప్రమాదమనీ, పిల్లలకు చదువుసంధ్యలు చెప్పించలేక, బికారుల్లాగా దేశం మీదికి వదిలి, చివరికి ఆత్మహత్య కూడా చేసుకోవలసిన గతి పడుతుందనీ, అందుకే బుద్ధిగా ప్రభుత్వం చెప్పినట్లు కుటుంబ నియంత్రణాన్ని అమలు జరిపి, భూభారాన్ని తగ్గించాలనీ ప్రబోధించటం ఈ చిత్రం ఉద్దేశ్యం. ఉద్దేశ్యం చాలా చక్కనిదే. మిగతా సంపదలమాట ఎలా ఉన్నా, జనాభా ఉత్పత్తి విషయంలో మాత్రం మిగతా దేశాలన్నింటినీ ఓడించి ప్రథమ స్థానం అలంకరించటానికి ప్రయత్నిస్తున్న తరుణంలో మన దేశంలో ఇటువంటి చిత్రాల ఆవశ్యకత ఎంతైనా ఉంది. అయితే ప్రయోజనాత్మక చిత్రం అనే పేరిట ప్రేక్షకులను విసిగించాలని కుట్రపన్నితే సహించబోరని మాత్రం నిర్మాతలందరూ గుర్తుంచుకోవాలి.
హేమాహేమీల శిఖరాగ్ర సమావేశం
దర్శకత్వం : రాజ్ ఖోస్లా; రచన : రాజేంద్రసింగ్ బేడీ; పాటలు : మజ్రూహ్ సుల్తాన్ పురీ; సంగీతం : ఎస్.డి. బర్మన్; ఛాయాగ్రహణం : జాల్ మిస్త్రీ; నేపథ్యగానం : ఆశాభోన్ స్లే, మహమ్మద్ రఫీ, మన్నాడే, ముఖేష్; నటీనటులు : దేవానంద్, సుచిత్రాసేన్, నాజిర్ హుస్సేన్, ఆచలాసచ్ దేవ్, ధుమాల్-వగైరా.
దుష్ట శిక్షణ శిష్ట రక్షణా తత్పరుడు, బుద్ధదేవుడు, టాగూరుల అడుగు జాడలలో నడచుకొనువాడూ, రూపజిత మన్మధుడు, సకల విద్యా పారంగతుడు, హోర్మోనియం, వేణువు, మృదంగం, సితారీత్యాది వివిధ వాద్య ప్రవీణుడు, అయిన ఒక సకల సద్గుణ సంపన్నుడిని, ఈ లక్షణాలన్నీ గల ఒక సినీ నాయిక ప్రథమ వీక్షణముననే ప్రేమించుట, అనంతరం వారిరువురూ, చిలకాగోరింకలవలె సైకిళ్ళపై షికారు చేయుట, డ్యూయెట్లు పాడుట, బీచిలో పుట్ బాల్ ఆడుకొనుట, జలక్రీడలు చేయుట, అహో రాత్రములు తియ్యని కలలు కనుట, ఈ చర్యలను సహించక ఒక విలను వాంప్ తో కలిసి కుట్ర పన్నుట, దుండగములు చేసి హీరో పైకి వాటిని నెట్టుట, నాయకీ నాయకులు పెక్కు కష్టములకు లోనగుట, నేపథ్యములో శివరంజనీ రాగము శహనాయిచే ఉచ్ఛైస్వనమున ఊదబడుట, బఫూను గంతులు వేయుట, క్లైమాక్సు నందు విలను విఫలుడై చనిపోవుట, ప్రేమికులు తిరిగి మొదటి డ్యూయెట్ ను పాడుకొనుట మున్నగు పాత సన్నివేశముల కుప్ప శారదా వారి 'బస్ కండక్టర్'.
సహస్రాబ్దాల చరిత్రను గర్భంలో ఉంచుకుని, గంభీరంగా, నిండుగా, భావగర్భితంగా ప్రవహిస్తుంది గంగాభవాని. ఏ స్వర్గంలోనో విహరించే తాను, ఏ మహాపురుషుని తపఃఫలితంగానో పతితులను పావనం చేసేందుకు, ఈ లోకానికి దిగివచ్చింది. ఆమె స్పృశించిన ప్రతి స్థలం దివ్యక్షేత్రమై వెలసింది. ఎన్నెన్నో ఇతిహాసాలు, కథలు, గాథలు ఆమె తిలకించింది. పరిణతి చెందుతూ వచ్చిన అనేక మతాలు, సంప్రదాయాలు, జీవన విధానాలు ఆమె పరిశీలించింది. కాలగర్భంలో ఎన్నెన్నో రాజ్యాలు, ఇతిహాసాలు, యుగాలు, చరిత్రలు గడ్డి పరకల్లా కొట్టుకుని పోవటం ఆమె కళ్ళారా చూసింది. ఈ మర్త్య లోకంలో అమరమై నిలిచింది తాను. వాల్మీకి, వ్యాసాది మహర్షుల కావ్య గానాలనూ, నారద తుంబురుల దివ్య గానాలనూ విన్నది..... భారత చరిత్రకు సాక్షీ భూతం గంగాభవాని.
డజన్ల కొద్దీ చిత్రాలు నిర్మించి, ప్రభుత్వ ఆదాయాన్నీ, ముడిఫిలిం పరిశ్రమనూ పోషించటం ఫిల్మిస్థాన్ వారి ఆదర్శం. ఆ డజన్లలో కొన్ని చిత్రాలు (పా)తాళప్రమాణాన ఉంటాయి. అటు మరాఠీలోనూ, ఇటు హిందీలోనూ బహుపురాతన కాలం నుంచీ అత్యధిక సంఖ్యలో ఫిల్ములను ఉత్పత్తి చేసిన ఉభయభాషా ప్రవీణులు ఫిల్మిస్థాన్ వారు. ఫిల్మిస్థాన్ లో పనిచెయ్యని దర్శకుడూ, నటించని తార, తెరకెక్కని కథా లేదని కొందరు మాటవరసకి అంటుంటారు. ఆర్థికంగా దెబ్బతిన్న ఫిల్మిస్థాన్ చిత్రాలను వ్రేళ్లమీద లెక్కించవచ్చును.
